------
-----
شفت ولد وبنت صغيرين
ماشيين
بيضحكوا ومبسوطين
وإيديهم متشابكين
قربوا منى وقالولى يا عمو
إحنا متعهدين
نفضل مع بعض
ونحب بعض
ولا تفرقنا السنين
------
بصيت لهم وضحكت
وقعدتهم جنبى
وربطت للولد الكوتش
وسويت للبنت ضفيرتها البنى
وخدتهم ومشيت
وحكيت لهم كتير حواديت
وهما مبسوطين
وبيتنططوا تنطيط
وإشتريت لهم قلب
مقسوم نصين
-------
وإديت لكل واحد
نص قلب
بصوا لبعض
وعرفوا إن هما بيكملوا بعض
فى الفراق موتهم
وفى القرب حياتهم
محدش بيعيش بنص قلب
وقالولى يا عموا احنا وصلنا البيت
سلمت عليهم ومشيت
وعدت سنين وسنين ونسيت
وفى يوم قاعد فى نفس المكان
فجأة لقيت
اتنين عليا جايين
---------
قعدوا جنب بعض
وبيكلوا درة مشوى
وقالها ثوانى هجيب عصير وجاى
بصتلى وقالتلى إذيك يا جدو
وطلعت نص قلب وقالتلى ياترى فاكرو
ضحكت وقلتلها فين النص التانى
قالتلى عايش بيموت ذيى مع حد تانى
طبطبت على كتفها
ومسحت دمعها
وطلعت نص قلب من جيبى
وقلتلها انا بردوا مع غيرى بيموت حبيبى
من سنين وسنين وسنين
---------
--------
نص قلب
حسن محمد على
ليست هناك تعليقات:
إرسال تعليق