صباحكم طيبة واصالة كفرراعي واهلها
===
يا كفرراعي المجد صلى لك
عز وشموخ الدرب ضوا لك
للشعر نسماتك وحي لفنون
وهباتها الحان موالك
باحضان غصنك شقشق الحسون
وشحرور ع البلوط غنا لك
بساطك ربيع يغازل الحنون
اللي بزهره مزينه شالك
مهد الكرز والتين والزيتون
والزعتر الرابي على تلالك
واللوز والرمان والليمون
مزروع بحقولك على ذيالك
مشتاق للبيدر وللطابون
والعقد وبير المي رسمالك
يا قريتي انتي ضيا لعيون
لهلك وفيهم دوم نيالك
وقت الشدايد صرختك بتمون
عنك بشيلو كل احمالك
ببعدك انا قلبي صفي محزون
مشتاق لك مشتاق لجبالك
يا قريتي يا محتوى ومضمون
بيحق لك تتفاخري بحالك
ابتك وفي بالمستحيل يخون
وبرخص الغالي دوم كرمالك
ترابك على مر الدهر ما يهون
ارواحنا يا روح فدوه لك
عشقي الك يا غاليه بجنون
جوا القلب منحوت تمثالك
شو ما جرى وشو ما يكون يكون
لا تتعبي ولا تشغلي بالك
انتي ترابك بالشرف معجون
ودم الشهاده طهر حنا لك
يا شامخه بعزم وابا رجالك
=== محمود شبيب ===
ليست هناك تعليقات:
إرسال تعليق